Pages

Showing posts with label عورتوں. Show all posts
Showing posts with label عورتوں. Show all posts

Wednesday, June 20, 2012

عورت اور ان پر مردوں کی جھوٹی فضیلت: آخری قسط, Urdu Section, NewAgeIslam.com

Urdu Section
عورت اور ان پر مردوں کی جھوٹی فضیلت: آخری قسط

حقوق النسواں مولوی ممتاز علی کی تصنیف ہے۔ یہ کتاب 1898میں لکھی گئی تھی۔ مولوی ممتاز علی علیگڑھ مسلم یونیورسٹی کے بانی سر سید احمد خاں کے ہمعصر تھے ۔ حقوق النسواں اسلام میں عورتوں کے حقوق پرپہلی مستند تصنیف ہے۔ مولونی ممتاز علی نےنہایت مدلل طریقے سے قرآنی آیات اور مستند احادیث کی مدد سے یہ ثابت کیا ہے کہ مردوں کی عورتوں پر نام نہاد برتری اور فضیلت اسلام یا قرآن کا تصور نہیں، بلکہ ان مفسرین کے ذہنی رویہ کا نتیجہ ہے ،جو مردانہ شاونیت (Chauvanism) کے شکار تھےاس کتاب کی اشاعت نے 111سال پہلے ایک نئی بحث کا دروازہ کھول دیا تھا۔ کچھ نے اس کتاب کی سخت مخالفت کی ،لیکن بہت سے علما نےاس تصنیف کو خیر مقدم کیا اور کچھ نے خاموشی ہی میں بہتر سمجھی روزنامہ ‘‘صحافت’’ ممبئی اسے اس لئے سلسلہ وار شائع کررہا ہے کہ ایک صدی بعد بھی یہ تصنیف اور اس کے مضامین آج کے حالات میں مطابقت رکھتے ہیں، اس لئے بالکل نئے معلوم ہوتے ہیں۔ امید ہے کہ یہ مضامین بغور پڑھے جائیں گے اور اس عظیم الشان تصنیف کا شایان شان خیر مقدم کیا جائے گا۔ایڈیٹر

بیوی کو لازم ہے کہ اگر کوئی کام جو خود اس کے اپنے کرنے کاہے اپنے شوہر کو کرتا دیکھے خواہ اس نے اس کےلئے بیوی کو کہا ہو یا نہ تو اس سے نہایت معذرت کے ساتھ لے لے اورکہے کہ جب میں موجود ہوں تو آپ خود کیوں تکلیف کرتے ہیں۔ اگر شوہر اس سے پہلے اس کے کرنے کےلئے کہہ چکا ہے تو عذر کر نا چاہئے کہ میں بھول گئی تھی یا مجھے خیال نہ رہا تھا ورنہ میں کیو ں اس کام کو نہ کرتی۔ لیکن اگر بیوی اس ذرا سے معاملہ پر سکوت کرے گی یا شوہر کے اس طرح کام کرنے کو اس کا شوقیہ کام سمجھ لے گی تو یہ اس کی سخت غلطی ہوگی اور شوہر کے دل میں کدورت اور رنج بٹھا نے کا باعث ہوگی۔

http://newageislam.com/urdu-section/عورت-اور-ان-پر-مردوں-کی-جھوٹی-فضیلت--آخری-قسط/d/2318


Sunday, June 17, 2012

عورت اور ان پر مردوں کی جھوٹی فضیلت:پانچویں قسط, Urdu Section, NewAgeIslam.com

Urdu Section
عورت اور ان پر مردوں کی جھوٹی فضیلت:پانچویں قسط

جس آیت کے روسے ایک مرد کی شہادت دو عورتوں کی شہادت کے مساوی قرار دی گئی ہے وہ آیت تمسک قرضہ سے تعلق رکھتی ہے ۔ ظاہر ہے کہ تحریر تمسکات ودستاویز ات حساب کتاب مطلوبہ عدالت یا محکمہ قضاۃ ایسے معاملات ہیں جو عام طور پر عورت کے لئے غیر معمولی قسم کے کام ہیں اوربوجہ کمی تعلیم وقلت تجربہ وعدم واقفیت ایسے معاملات ہیں جو عورت کی حالت کے مناسب نہیں نہ ان کو عورت عرضہ دراز تک یاد رکھ سکتی ہیں۔ مردوں کو چونکہ اس قسم کی معاملہ فہمی کی عادت ہوتی ہے وہ ایسے معاملات کو بخوبی یادرکھ سکتے ہیں ۔ اس واسطے ایک عورت کی بجائے دو عورتیں شہادت کےلئے ضروری ٹھہریں تاکہ اگر ایک عورت صورت معاملہ بھول جائے تو دوسری عورت اس کو یاد کراسکے۔ چنانچہ قرآن مجید میں جہاں شہادت مذکورہ بالا کاذکر آیا ہے وہاں یہ علت اس حکم کی بیان کی گئی ہے۔ چنانچہ فر مایا ہے کہ ( ان تضل احداہما فتذکراحد ا بما لاخریٰ) دوعورتیں ہونی چاہئیں کہ اگر ایک بھول جائے تو دوسری عورت اس کو یاد کراسکے ۔ جب قرآن مجید نے خود اس تفریق کی یہ وجہ قرار نہیں دی کہ عورت بلحاظ خلقت مرد سے نصف درجہ رکیتو ہے تو بیچارے فقہا کس گنتی میں ہیں جو محض اپنے ذہن نارسا سے ایسے وجوہ فاسد ہ اختراع کر کے نصف دنیا کی حق تلفی کریں۔

ثانیا قرآن مجید کا یہ حکم جس میں اس قسم کی شہادت کا ذکر ہے ایک اختیاری حکم ہے جس کی تعمیل ہر مسلمان پر ضروری او رلازمی قرار نہیں دی گئی ۔پس ایک ارشادی حکم کے ذیل میں ایک امر کا محض ضمنی طور پر مذکورہ ہونا خود اپنی وقعت کھونے یا کم کرنے کے لئے کافی وافی ہے۔

ثالثا ہم نے جو وجہ اول میں بیان کیا کہ دوعورتوں کی شہادت کوایک مردکی شہادت کے مساوی قرار دینا بلحاظ نوعیت معاملہ ہے نہ بلحاظ کمی و زیادتی درجہ زکورو اناث اس کے ثبوت میں یہ بھی پیش ہوسکتا ہے کہ تمسک مذکورہ کے علاوہ دیگر معاملات میں جو فہم عورت کے لئے غیر معمولی نہیں ہیں مثلاً معاملات ‘نکاح’ طلاق ۔ حدو وقصاص وغیرہ میں جہاں کہیں قرآن مجید میں شہادت کے باب میں احکام آئے ہیں وہاں اس قسم کی تفریق درجہ نہیں کی گئی ۔

http://www.newageislam.com/عورت-اور-ان-پر-مردوں-کی-جھوٹی-فضیلت-پانچویں--قسط/urdu-section/d/2072


عورت اور ان پر مردوں کی جھوٹی فضیلت:چھٹی قسط, Urdu Section, NewAgeIslam.com

Urdu Section
عورت اور ان پر مردوں کی جھوٹی فضیلت:چھٹی قسط
مولوی ممتاز علی کی مائیہ ناز تصنیف ‘‘حقوق نسواں’’
اولا اس آیت میں سخت اجمال ہے ۔ اس حکم خداوندی سے یہ ظاہر نہیں ہوتا کہ چار عورتیں اس طرح نکاح پر جائز ہیں کہ ایک وقت میں ان سے نکاح لیا جائے ۔ یا اس طرح کہ ایک کے مرنے کے بعد دوسری ہو اور دوسری کے مرنے کے بعد تیسرا نکاح اور تیسری کے مرنے کے بعد چوتھا اور چوتھے نکاح کے بعد نکاح کی کلی ممانعت ہو۔ یا یہ مراد الہی ہوکہ اگر اتفاقاً کسی حالت صحت جسمی کے نقص سے بیوی فرائض زوجیت کے پورا کرنے کے قابل نہ رہے تو دوسرا نکاح اور اس کے معذور ہونے پر تیسرا نکاح۔ علی بذا القیاس نکاح تک جائز رکھے گئے ہوں یا شاید یہ مقصود ہو کہ پہلی بی بی کو طلاق دے کر دوسری اور دوسری کو طلاق دے کر تیسری اور تیسری کو طلاق دے کر چوتھی بیوی سے نکاح کیا جاسکتاہے اس سے زیادہ نکاح جائز نہیں ہیں۔ یا شاید مقصو د قرآنی یہ ہوکر ازدواج ثانی زوجہ اول کی یا اس کے عزیزوں کی رضا مندی کی شرط سے عمل میں آنا چاہئے ۔ چونکہ آیت مذکورہ صدر میں کوئی امر ایسا نہیں جس سے ان مختلف معانی میں سے کوئی معنی واحد یا التصریح ہوسکیں اس لئے ہم اس آیت کو مجمل قرار دیتے ہیں جو مفید قطعیت نہیں ہوسکتی ۔ اور بدینو جہ وہ کسی حکم شرعی کے لئے نص نہیں ہے۔ ہمارے علما اس کو تسلیم کریں یا نہ کریں مگر ہمیں یقین ہے کہ اغلب احتمال یہ ہے کہ پہلی بیوی اور اس کے اقربا کی رضا مندی شرط ہے۔ اس یقین کے لئے رسول خدا صلی اللہ علیہ وسلم کا عمل ہمارے لئے کافی دلیل ہے۔ صحیح بخاری کی ایک حدیث ہے جس کا خلاصہ مضمون یہ ہے کہ حضرت علی نے باوجود موجودگی حضرت فاطمہ کے ارادہ کیا تھا کہ ابوجہل کی لڑکی سے جس نے اسلام قبول کرلیا تھا نکاح کرلیں۔چنانچہ اس لڑکی کے رشتہ داروں نے جناب رسول خدا صلی اللہ علیہ وسلم سے اس امر کی اجازت طلب کی۔ آنخصرت کو بہت غصہ آیا اور آپ نے منبر پر بیٹھ کر خطبہ پڑھا جس میں بیان کیا کہ یہ لوگ مجھ سے اجازت چاہتے ہیں کہ میری بیٹی کے ہوتے کسی کواپنی نکاح میں دیں سو میں نہیں اجازت دیتا۔ نہیں اجازت دیتا نہیں اجازت دیتا ۔ ہاں علی کو ایسا ہی کرنا منظور ہے تو میری بیٹی کو طلاق دے دے اور دوسری بیوی کر لے یہ میری لخت جگر ہے ۔ جو اس سے برائی کرے گا وہ مجھ سے برائی کرے گا جو اس کو ستائے گا وہ مجھ کو ستائے گا ۔ اس حدیث سے صاف ظاہر ہوتا ہے کہ بعض لوگوں نے حکم قرآنی سے یہ سمجھا تھا کہ نکاح ثانی کےلئےاجازت از قسم مذکورہ بالا حاصل کرنی ضروری ہے۔
http://www.newageislam.com/عورت-اور-ان-پر-مردوں-کی-جھوٹی-فضیلت-چھٹی--قسط/urdu-section/d/2078

عورت اور ان پر مردوں کی جھوٹی فضیلت:ساتویں‘‘بی’’ قسط, Urdu Section, NewAgeIslam.com

Urdu Section
عورت اور ان پر مردوں کی جھوٹی فضیلت:ساتویں‘‘بی’’ قسط
مولوی ممتاز علی کی مائیہ ناز تصنیف ‘‘حقوق نسواں’’

طلاق کا اختیار جو مردوں کو دیا گیا ہے وہ ایسا ہے کہ مردوں کو اس سے شرمانا چاہئے اور اگر ان میں شرافت انسانی کا ثبوت ہوسکتا ہے تو اس اختیار کو استعمال میں نہ لانے سے ہوسکتا ہے طلاق ایک نہایت تلخ مزہ دوا ہے جو صرف ایسے مرض کا علاج ہے جس کی اور کوئی تدبیر معالجہ نہ ہوسکے۔ میاں بیوی کے باہمی تعلقات ایسے نازک اور اہم اور قابل اخفا ہوتے ہیں کہ دنیاوی عدالتوں کی طرف ان کے انفصال کے لئے رجوع کرنا ان رنجشوں کو اور ترقی دینا ہے۔ یہ صحیح ہے کہ نکاح ایک معاہدہ مثل دیگر معاہدوں کے ہے اور معاہدوں کی تکمیل کے بعد ہر فریق کو اختیار ہے کہ عہد شکن فریق کو ایفائے معاہدہ پر شرعا مجبور کرے یا کرائے۔ مگر یہ عہد شکنی ایسی حالت قلبی کا نتیجہ ہوتا ہے کہ اس حالت کی موجودگی میں جبراً ایفائے معاہدہ کرنا صرف ایک ظاہری ایفا ہوسکتا ہے ۔ لیکن حقیقتاً وہ معاہدہ شوہر و زوجہ کے قلبی ارتباط سے تعلق رکھتا ہے اور جبر سے اس کا ایفا حقیقی ممکن نہیں ہے کچھ نہیں ہے کچھ شک نہیں کہ ظاہر ی معاہدہ ایک بیرونی نشان او ر اعلان دوشخصیتوں میں روحانی رشتہ پیدا ہونے کا ہے لیکن روح کھو کر صرف جسم باقی رکھنا یعنی اصل اغراض نکاح کوچھوڑ کر عدالت سے ظاہری معاہدہ کا ایفا بہ جبر کرانا کیا فائدہ دے سکتا ہے۔ ضرور ہے کہ ایسے ناگریز حالات میں فریقن کی رائے سے علیحدگی کی اجازت دی جائے مگر سوال یہ ہے کہ کس فریق کے ہاتھ میں یہ اختیار رکھا جاوے ہماری رائے میں جہاں ہوا س کا اختیار دونوں فریق میں کسی ہاتھ میں ہونا یکساں نتیجہ پیدا کرے گا۔

کیونکہ عموماً یہ ممکن نہیں ہے کہ مرد تو اپنی بیوی سے یہ کہے کہ میں آئندہ تجھ کو اپنی بیوی بنا کر رکھنا نہیں چاہتا ۔ اور بیوی کو اس مرد سے ایسی محبت قلبی ہو کے اس سے جدا نہ ہونا چاہئے ۔پس ایسی حالت میں ضرور ہے کہ علیحدگی ہو خواہ اس کا اظہار مرد کی جانب سے ہو خواہ عورت کی جانب سے۔

http://www.newageislam.com/عورت-اور-ان-پر-مردوں-کی-جھوٹی-فضیلت-ساتویں‘‘بی’’--قسط/urdu-section/d/2085


عورت اور ان پر مردوں کی جھوٹی فضیلت: نویں قسط, Urdu Section, NewAgeIslam.com

Urdu Section
عورت اور ان پر مردوں کی جھوٹی فضیلت: نویں قسط

مولوی ممتاز علی کی مائیہ ناز تصنیف ‘‘حقوق النسواں ’’

سورہ نساں جس میں عورتوں کی نسبت زیادہ تر احکام ہیں اور اس طرح شروع ہوتی ہے۔ اے لوگوں اپنے پروردگار سے ڈرو جس نے تم کو ایک قسم کی جان سے پیدا کیا اور اسی سے تمہارا جوڑا پیدا کیا ۔ یا ایہا الناس التقوا بکم الذی خلقکم من نفس واحد ۃ وخلق منہا وز جہاں اس سورۃ میں ورثا اور یتیموں او ر عورتوں کے حقوق بیان کئے گئے ہیں اور ان کے حق میں بے انصافی کو منع کیا ہے اس لئے اوّل ہی فرمایا کہ سب مرد اور عورتیں ایک سی جان اور ایک سی خواہشیں رکھتی ہیں جس طرح تم کو حق تلفی سے رنج پہنچتا ہے کیو نکہ تم سب ایک طرح کی جان رکھتے ہو۔ اس لئے ان کے حق میں بے انصافی کرنے سے اللہ سے ڈرو ۔ پھر اسی سورہ میں باوجود اس کے کہ عورت کے جملہ مصارف شوہر کے ذمہ ہیں اس کو ترکہ پدری میں مرد کے نصف حصہ کی برابر اور حص ہدیا جیسا کہ اوپر مذکور ہوا بلکہ بعض صورتوں میں مرد اور عورت کا حصہ بالکل برابر کردیا مثلاً اگر میت اولاد اور والدین چھوڑے تو اس صورت میں میت کے والدین کو چھٹا حصہ ملے گا یعنی اس کی ماں اور باپ مساوی حصہ پائیں گے علی ہذا القیاس جب میت کے نہ والدین ہوں نہ اولاد بلکہ صرف بھائی بہن تو بھائی بہن کے لئے بھی مساوی حصہ مقرر کیا گیا ہے۔

پھر عورتوں کے لئے حق مہر جدا مقرر کیا گیا ہے اور بحالت طلاق ا س تمام مہر میں سے خواہ کتنا کیوں نہ ہو مرد کو ایک حبہ تک واپس لینے کی اجازت نہیں دی گئی ۔ عرب میں ایک نہایت خراب دستور تھا کہ جب عورت منکوحہ سے نفرت ہوجاتی تھی تو اس کے ساتھ سخت کج ادائی کرتے تھے لاچار وہ دق ہوکر مہر واپس کر کے طلاق لے لیتی تھی ۔خدائے تعالیٰ نے اس رسم قبیح کو اس طرح منع فرمایا کہ عورتوں کو تنگ مت کرو اس نیت سے کہ جو تم نے ان کو دیا ہے اس میں سے کچھ واپس لو ۔پھر ان کے ساتھ حسن سلوک کی یوں تاکید فرمائی ہے کہ عورتوں کے ساتھ نیک معاشرت کرو۔ اور اگر تم کو وہ بری لگیں تب بھی یہ سمجھنا چاہئے کہ ممکن ہے کہ تم کو ایک شے بری لگے اور اللہ اس میں تمہارے لیے بھلائی کرے ۔پھر مرد اور عورت میں مساوات اس طرح ظاہر فرمائی کہ مردوں کو اپنی کمائی کا حصہ ہے اور عورتوں کو اپنی کمائی کا حصہ ہے یعنی دونوں برابر ہیں ایک کو دوسرے پر ترجیح نہیں ہے ہر ایک کے لئے اپنے اپنے اعمال ہیں۔ پھر عورتوں کے حق خلع کو یوں بیان فرمایا اگر کوئی عورت اپنے شوہر کی بدمزاجی سے ڈرے توکچھ ہر ج نہیں کہ وہ آپس میں صلح کرلیں اور اگر وہ علیحدہ ہوجائیں تو ہر ایک کو اللہ اپنی فراخ دستی سے غنی کردے گا۔

http://newageislam.com/urdu-section/عورت-اور-ان-پر-مردوں-کی-جھوٹی-فضیلت--نویں-قسط/d/2091


عورت اور ان پر مردوں کی جھوٹی فضیلت:قسط14, Urdu Section, NewAgeIslam.com

Urdu Section
عورت اور ان پر مردوں کی جھوٹی فضیلت:قسط14

مگر یہ کتابیں نہ کسی کمیٹی نے لڑکیوں کے واسطے منتحب کی تھیں ۔ نہ ان کتابوں کو ان کے مصنفوں نے لڑکیوں کی تعلیم کے واسطے تصنیف کیا تھا۔ بلکہ اصل بات یہ ہے کہ اس زمانہ میں اردو زبان کا علم ادب انہیں کتابوں پر مشتمل تھا ۔مگر ایسا بھی نہ تھا کہ اردو میں بالکل او رکچھ نہ تھا۔ اور جب اس اردو علم کا دروازہ لڑکیوں پر کھل جاتا تھا تو اسی راستہ سے گل بگاؤ لی اور بدر منیر اور چہار درویش بھی گھس آتی تھیں خود چہار درویش جس نے حضرت نظام الدین اولیا اور خسرو کے بابرکت ناموں سے بزرگی حاصل کرلی ہے۔ چہار درویش سادہ بے تکلف اردو کا عمدہ ترین نمونہ ہے۔ اس کی زبان کی سلاست اور سادگی اور فارسی عربی کی امیز ش سے خالی ہونا حقیقت میں بے حد تعریف کے قابل ہے مگر اس کے بعض قصے اس قدر فحش ہیں کہ لڑکیاں تو کیا لڑکوں کے پڑھنے کے بھی قابل نہیں ۔ اس زمانہ کا لٹریچر بہت وسیع ہوگیا ہے مگر جس طرح اچھی کتابوں کی تعداد بڑھ گئی ہے اسی طرح بری کتابوں کی سب سے زیادہ انبار اردو میں ناولوں کا ہے۔

جو عموماً نہایت ناپاک اور خلاف تہذیب فحش اور نجش خیالات اور عبارات سے پر اور لبریز ہیں۔ ناپاک ناول لکھنا یا ناپاک ناولوں کاترجمہ کرنا ایک قسم کی کتابی قرمساقی ہے ان مصنفوں کو جو ایسا کام کررہے ہیں خدا نے چا رپیسہ کے لالچ سے اندھا کردیا ہے اور نہایت افسو س ہے کہ ان کولچو ں کی شہواتی قو توں کی خدمت کے سوا اور کوئی کام اپنے معاش کے حاصل کرنے کا پسند نہیں آیا ۔ناولوں میں جو چند ناول عمدہ بھی ہیں تو ان میں بھی ایک نقص ہے وہ یہ کہ ان کے موضوع متمول خاندان ہیں۔ کیو نکہ ایسے خاندان میں ہی اسباب عیش وعشرت اور سامان راحت اس قدر ہوتے ہیں جو قابل قصہ ہونے کے ہوں ۔پس غریب خاندان کی لڑکیاں جب آسودگی اور سلیقہ کا نمونہ اس تمول اور آسودہ حالی کو پاتی ہیں تو اپنی حالت سے سخت بیزار ہوجاتی ہیں اور ان کی زندگی بے لطف ہوجاتی ہے۔ قناعت کی خو شی دل سے جاتی رہتی ہے۔ بلکہ یہ عیب ہمارے مولانا مولوی نذیر احمد صاحب کی کتابوں میں بھی ہے کہ انہوں نے آسودہ حال متمول گھر کا قصہ لکھا ہے جس سے لڑکیوں میں اس قدر بلند نظری پیدا ہوجاتی جو ان کی حالت خاندان کے مناسب حال نہیں ہوتی۔ ہر لڑکی یہ ہی جانتی ہے کہ میرا گھر اصغری کے گھر کی طرح اجلا ہو جو ناممکن ہے۔ ہر لڑکی چاہتی کہ میرا شوہر تحصیلدار ہو یا ڈپٹی ہو اس سے کم درجہ کا شوہر اس کی نظروں میں وقعت نہیں رکھتا۔

http://newageislam.com/urdu-section/عورت-اور-ان-پر-مردوں-کی-جھوٹی-فضیلت-قسط-14/d/2113


Saturday, June 16, 2012

عورت اور ان پر مردوں کی جھوٹی فضیلت:قسط 17, Urdu Section, NewAgeIslam.com

Urdu Section
عورت اور ان پر مردوں کی جھوٹی فضیلت:قسط 17
پہلی آیت میں مردوں کو ہدایت فرمائی ہے کہ وہ اپنی نظر ذرانیچی رکھیں اور پاکبازی اختیار کریں۔ دوسری آیت میں انہیں الفاظ میں وہ ہی حکم اسی قدر نظر نیچی رکھنے اور پاکبازی کا عورتوں کو دیا گیا ہے۔ یہاں تک تو جس قدر حکم شرم وحیا و پاکبازی کا عورتوں کو دیا گیا ہے اتنا ہی مردوں کو دیا گیا ہے ۔کوئی خاص پردہ عورتوں کے واسطے تجویز نہیں کیا گیا۔ لیکن چونکہ عورتوں میں شرم وحیا مردوں کی نسبت زیادہ ہے اس لئے اسی زیادتی کے موجب اس شرم و حیا کو عمل میں لانے کا حکم دیا گیا اور وہ یہ ہے کہ عورتوں کی حرکات ایسی نہیں ہونی چاہئے کہ ان کی زینت یا آرائش جو دوسرے آدمی کو بظاہر ہر نظر نہیں آتی ان حرکات سے اس پوشیدہ زینت کی نمائش ہو۔ عرب کی عورتیں اپنے گریباں کھلے رکھتی تھیں اور چاک گریباں سے سینہ نظر آتا رہتا تھا جو موجب سخت بے حیائی کا تھا۔ اس بے حیائی کو روکنے کے لئے گریبانوں پر دوپٹہ ڈالنے یعنی ان کو چھپانے کا حکم دیا گیا ہے۔ پھر فرمایا کہ اس قسم کی نمائش صرف شوہر یا باپ یاد یگر محرم رشتہ دار یا نوکر چاکر یا کم عمر بچوں کے روبرو جائز ہے ۔ اس حکم میں جو بالتخصیص عورتوں کے لئے ہے۔ دوا مور قابل غور ہیں اول یہ کہ شوہر ودیگر محارم کے سوا اور کسی کو پوشیدہ حسن یا زیب وزینت کھول کر دکھانی ممنوع ہے ۔ البتہ جس قدر خونی بخود ظاہر نظر آتی ہو اس کا نظر آنا ہر شخص کے روبرو جائز ہے۔ دوم یہ کہ گھر وں میں چونکہ اس قسم کی تکلیف درستی لباس کا ہر وقت قائم نہیں رہ سکتا جیسا باہر نکلنے میں کیا جاتا ہے اس لئے نوکر چاکر وں کے روبرو بھی یہ تکلیف کی سخت پابندی معاف ہے ۔ دوسری آیت سورہ احزاب کی ہے جس میں عورتوں کو فرمایا کہ تم اپنے گھروں ٹھہرو اور جس طرح ایام جاہلیت میں دکھاتے پھرنے کا دستور تھا اس طرح مت دکھاتی پھرو ۔ اس آیت میں صرف زمانہ جاہلیت کی بے حیائی و بے شرمی کو کہ عورتیں سنگار کر کے اکھاڑوں میں جاتیں اور بے حیائی کے اشعار پڑھتیں منع فرمایا ہے اور صاف ظاہر ہے کہ گھر میں ٹھہر نے کا جو ذکر ہے وہ اس آوارہ گردی زمانہ جاہلیت کے مقابلہ میں ہے اس کا یہ منشا ہر گز نہیں کہ جائز ضرورتوں کے لئے بھی گھر سے نکلنا ممنوع ہے بے شک شریف حیا دار عورتوں کو ایسے ناپاک میلوں میں ہرگز نہیں جانا چاہئے بلکہ اپنے گھر ٹھہرنا چاہئے ۔ اس آیت میں صرف ایام جاہلیت کی آوارگی کو روکا گیا پردہ سے آیت کا بالکل تعلق نہیں ہے۔ اس آیت سے یہ نہیں نکلتا ہے کہ ایام جاہلیت کی سی نمائش کے بغیر او رنہایت شریفانہ طور پر ضرورتاً عورت کا باہر نکلنا ممنوع ہے۔
http://newageislam.com/urdu-section/عورت-اور-ان-پر-مردوں-کی-جھوٹی-فضیلت-قسط-17/d/2122

عورت اور ان پر مردوں کی جھوٹی فضیلت:قسط 18, Urdu Section, NewAgeIslam.com

Urdu Section
عورت اور ان پر مردوں کی جھوٹی فضیلت:قسط 18

اس پر خدائے تعالیٰ نے حکم فرمایا کہ وہ اپنی چادریں کسی قدر نیچے تک لٹکاکر آئیں جائیں اور وہ اس شریفانہ وضع سے جس کا عام طور پر سب کو حکم دے دیا گیا بآسانی شناخت ہوجایا کریں گی کہ یہ خاتون ان اہل اسلام ہیں اور پھر منافق ستانے سے بازرہیں گے پس اس آیت کو بھی غیر محارم کے روبرو ہونے کے جو ازیام عدم جواز سے تعلق نہیں ۔بلکہ منافق جو عدم شناخت کے بہانہ سے مسلمانوں کی عورتوں کو ستاتے تھے ان کی ایذا سے بچنے کے لئے ایک خاص شریفانہ وضع سے جو سب کے لئے بطور علامت ہو نکلنے کے لئے حکم دیا گیا ہے۔ بجائے اس کے اس آیت سے ہندوستان سے پردہ کی تائید ہو حالت ایذ ایابی میں بھی بلا نقاب وغیرہ جس کا اس آیت میں کہیں اشارہ تک نہیں صرف چادر کواس طرح اوڑھ کر کہ وہ کسی قدرلٹکی رہے بلاشرط اس امر کے کہ اس سے چہرہ چھپ جائے باہر نکلنے کی اجازت دی گئی ہے۔

جو آیتیں اوپر مذکورہ ہوئیں ان کے سوا اور کوئی آیت قرآن مجید میں پردہ کے متعلق نہیں ہے۔پس قرآن مجید اگر جواب دہ ہے تو صرف اس قدر پردہ کا ہے جو ان آیتوں میں بیان ہو اور سراسر مطابق عقل وفطرت انسانی ہے ۔قرآن مجید ان خرابیوں کا جواب دہ نہیں ہوسکتا جن کا موجب وہ پردہ ہے جس کا اشارہ تک کلام الہٰی میں نہیں ملتا اور جس کے موجد صرف مسلمانان ہندوستان ہیں۔قبل اس کے کہ ہم قرآن مجید کی بحث ختم کریں ایک اور آیت کا بھی ذکر کرنا مناسب ہے جس کو ممکن ہے کہ لوگ غلطی سے پردہ کے متعلق سمجھیں ۔ ہماری مراد سورہ احزاب کے اس آیت سے ہے جہاں خدائے تعالیٰ نے فرمایا ہے کہ جب تم کو ان (عورتوں) سے کوئی چیز مانگنی ہوتو پردہ کے پیچھے سے مانگو کہ یہ امر تمہارے لئے اور ان عورتوں کے لئے دل کی پاکیزگی کا موجب ہے۔ یہ آیت اول تو ازواج مطہرات پیغمبر خدا سے متعلق ہے جن کی نسبت خدائے تعالیٰ نے عام عورت سے علیحدہ کچھ احکام دئے تھے چنانچہ اگلی پچھلی آیات کے پڑھنے سے بخوبی ثابت ہے اس کے علاوہ یہ آیت تعلق رکھتی ہے اس حکم سے جس کے روسے بلا اجازت پیغمبر خدا کے گھر میں جانے کی ممانعت کی گئی ہے اس مضمون کا حکم جملہ اہل اسلام کی نسبت سورہ نور میں اس طرح بیان فرمایا گیا ہے کہ اے ایماندار لوگو! اپنے گھر کےسوا اور گھروں میں داخل نہ ہونا جب تک کہ اجازت نہ لے لو اور گھر والوں کو سلام نہ کرلو۔ یہ تمہارے لئے اچھا ہے ۔شاید تم نصیحت حاصل کرلو۔ اگرتم گھر پر کسی کو نہ پاؤ تو جب تک تم کو اجازت نہ ملے ان میں داخل مت ہو۔ اور اگر تم کوواپس چلے جانے کو کہا جاوے تو تم واپس چلے جاؤ کہ یہ تمہارے لئے پسندیدہ ہے۔

http://newageislam.com/urdu-section/عورت-اور-ان-پر-مردوں-کی-جھوٹی-فضیلت-قسط-18/d/2130


عورت اور ان پر مردوں کی جھوٹی فضیلت:قسط 19, Urdu Section, NewAgeIslam.com

عورت اور ان پر مردوں کی جھوٹی فضیلت:قسط 19

کچھ ضروری نہیں ہے اور ذرا ذرا سی چیز کے لئے گھر والوں کو گھڑی گھڑی اس طرح تکلیف دینا کیا حاصل بہتر ہےکہ گھر کی عورتیں جس حال میں ہیں اسی میں رہیں تم پردہ کے پیچھے سے جو چیزمانگنی ہے مانگ لو۔ عموماً ہر شخص کو یہ امر پیش آتا ہے کہ گرمی کی شدت کے وقت یا کسی کام میں حد سے زیادہ مصروفیت کی وجہ سے گھر میں عورتوں کو یہ خیال نہیں رہتا کہ ان کے سر پر ٹھیک طور پر دوپٹہ ہے یا نہیں۔ یا بوجہ علالت یا کسی اور باعث سے وہ ایسی آزادگی کے ساتھ اپنے گھر میں لیٹی ہوئی ہیں کہ غیر کے روبرو وہ آزاد گی جائز نہیں ہوسکتی ایسی صورتوں میں اگر مردانہ مکان میں چند آدمی جمع ہوں جن کےلئے کبھی پان کے واسطے او رکبھی پانی کے واسطے اور کبھی حقہ یا کسی اورشے کے واسطے کسی مرد کو اندر آنے کی ضرورت پڑے تو اب کس قدر دقت ہے اگر ہر دفعہ وہ شخص اندر آنے کی اجازت طلب کرے اور ہر بار گھر کی سب عورتیں مودبانہ قرینہ سے بیٹھیں اس سےبہتر ہے کہ وہ پردہ کے باہر سے جو کچھ مانگنا ہو مانگ لے۔

یہا ں تک جو کچھ ہم نے لکھا وہ اس تفسیر کی بنا پر تھا جوہم خود الفاظ قرآن مجید کے سمجھتے ہیں ۔ اب یہ دکھانا چاہتے ہیں کہ ہمارے علما فقہ جن کا خاص کام قرآن مجید سے احکام کا استنباط کرنا ہے اس باب میں کیا لکھتے ہیں ۔فتاویٰ عالمگیری میں پردہ کی بحث کونہایت تفصیل کے ساتھ لکھا ہے اور اس کو چار حصوں میں تقسیم کیا ہے۔ اول مرد کا مردکو دیکھنا۔ دوم عورت کا عورت کو دیکھنا ۔سوم عورت کو مرد کو دیکھنا ۔چہارم مرد کا عورت کو دیکھنا پہلی تین صورتوں میں لکھا ہے کہ جس قدر حصہ بدن مابین ناف وزانوں کے ہے اس کو دیکھنا ناجائز ہے ۔ اورصورت چہارم کے پھر چار اقسام کئے ہیں اول مرد کا اپنی بیوی و لونڈی کو دیکھنا ۔ثانی مرد کا اپنی ذوات محارم کو دیکھنا ثالث مرد کااجنبی آزادعورت کو دیکھنا۔ رابع مرد کا غیر لونڈیوں کو دیکھنا ۔ ہم صورت اول و رابع کو بیان کرنا غیرضروری سمجھتے ہیں ۔ صورت ثانی یعنی ذوات محارم کے دیکھنے کی نسبت فتاویٰ عالمگیری میں لکھا ہے کہ ذو ات محارم مثلاً ماں بہن وغیرہ کی ظاہری اور باطنی زینت کے مقام کو دیکھنا جائز ہے اور وہ یہ ہیں۔سر ، بال، گردن، سینہ، کان ، بازو، پہونچا،ہتھیلی ، پنڈلی ، پاؤں اور چہرہ ۔

http://newageislam.com/urdu-section/عورت-اور-ان-پر-مردوں-کی-جھوٹی-فضیلت-قسط-19/d/2133


عورت اور ان پر مردوں کی جھوٹی فضیلت: قسط 21, Urdu Section, NewAgeIslam.com

عورت اور ان پر مردوں کی جھوٹی فضیلت: قسط 21
بڑے پائچوں کے پاجامے بھی گوبظاہر نہایت پردہ کی چیز ہیں مگر ایک طرح مخل ستر ہوتے ہیں یعنی بہت بڑے ہونے کی وجہ سے بغیر اس کے کہ ان کو اٹھا کر چلیں چلنا پھرنا مشکل ہے اور ان کو اٹھا کر چلنے سے کسی قدر حصہ پنڈلیوں کا برہنہ ہوجاتا ہے ۔ دیہات میں عموماً دہلی کی سی بانکی کرتیاں تو نہیں پہنی جاتیں بلکہ ان کی بجائے کرتے پہنے جاتے ہیں مگر ان کے گریباں کھلے رہتے ہیں جس میں سے کسی قدر چھاتی کا بالائی حصہ نظر آتا رہتا ہے غرض ہندوستانی لباس عورت میں اس حکم خداوندی کی جس کے رو سے چہرہ اور ہاتھ کےسوا کل جسم او رپوشیدہ خوبصورتی کے چھپانے کی سخت تاکید فرمائی گئی ہے ذرا بھی تعمیل نہیں ہوتی او ر کچھ شک نہیں کہ اس قسم کا لباس پہننا بالکل حرام ہے۔ یہ بے حیائی کا لباس پہنا کر ان کو چار دیواری میں قید کرنا اور ان کو ہوائے تازہ میں جو صحت کے لئے طبعات ان کو اسی قدر ضرور ہے جس قدر مردوں کوبرقع اوڑھ کر بھی نہ نکلنے دینا پر ے درجے کی حماقت ہے۔ او ر عورتوں پر صریح ظلم ہماری دانست میں شرعی لباس پہن کر اور دوپٹہ ایسی طرح اوڑھ کر سرکاکوئی حصہ برہنہ نہ رہے، کھلے چہرے او رہاتھوں سے ایسے اجنبی اشخاص کے روبرو جن پر ان کے شوہروں اور والدین کو نیک چلنی کا اعتبار ہو۔ اپنے محرم عزیزوں کی موجودگی میں بشرط ضرورت روبرو ہونا لوگوں کے خیال میں کیسا ہی معیوب ہو،مگر خدا اور رسول کے احکام کے مطابق اور اس بے حیائی سے جو گھروں میں رہ کر لباس حرام کے ذریعہ سے عمل میں آتی ہے۔ بدر جہاں بے عیب اور بے گناہ ہے۔ اس عملدر آمد پر اگر کوئی شرعاً اعتراض ہوسکتا ہے تو شاید صرف یہ ہوکہ لوگ اجنبی عورت کو اس طرح باہر نکلتا دیکھ کر نظر بدسے تاکا کریں گے۔
http://newageislam.com/urdu-section/عورت-اور-ان-پر-مردوں-کی-جھوٹی-فضیلت--قسط-21/d/2146