Pages

Showing posts with label زاہدہ حنا. Show all posts
Showing posts with label زاہدہ حنا. Show all posts

Tuesday, June 19, 2012

لوگوں کانٹے نہ بونا, Urdu Section, NewAgeIslam.com

Urdu Section
لوگوں کانٹے نہ بونا

زاہدہ حنا (کراچی)

آپ کو بھی وہ زمانہ شاید یاد ہو جب اسکولوں اور کالجوں کے تقریری اور تحریری مقابلو ں میں یہ موضوع دیا جاتا تھا کہ ‘‘اسلام تلوار کی طاقت سے دنیا میں پھیلا !؟’’تو لکھنے اور بولنےوالے اس موضوع کی مخالفت میں پوری قوت سے لکھتے اور بولتے تھے۔ یہ لکھا اور کہا جاتا تھا کہ یہ عیسائیوں اور بہ طور خاص انگریز کالگایا ہوا الزام ہے جسے ہم بالکل تسلیم نہیں کرتے۔ دنیا بھر کے اور بہ طور خاص برصغیر میں صوفیائے کرام کے ناموں کی ایک طویل فہرست گنوائی جاتی ہے ۔ بات ملتان میں آنے والے صوفیوں سے شروع ہوتی تھی اور پھر علی ہجویری ،معین الدین چشتی ،نظام الدین اولیا ، روشن چراغ دہلی، عبداللہ شاہ غازی ، لال شہباز قلندر اور سیکڑوں مشہور اور نسبتاً کم مشہور صوفیا کی فہرست پیش کردی جاتی تھی۔ دیوا شریف ،پیلی بھیت اور جانے کن کن درگاہوں کا نام لیا جاتا اور کہا جاتا تھا کہ وہ لوگ ہیں جنہوں نے اپنے حسن سلوک اور وسیع المشربی سے غیروں کے دل موم کیے ۔ہزارہاں ان کے دست حق پر ست پر اسلام لائے ۔ یہ وہ صوفیا تھے جو ‘‘ مسلماں اللہ اللہ ،بابر ہمن رام رام ’’ کی بات کرتے تھے اور ان لوگوں کے دل جیتتے تھے جن کے سمندر کے درمیان ،باہر سے آنے والے مسلمان چھوٹے چھوٹے جزیروں سے زیادہ کی حیثیت نہیں رکھتے تھے ۔بیشتر مورخین اور ماہرین عمر انیات کا کہنا ہے کہ اگر ان صوفیا نے ہندوستان میں رواداری اور وسیع المشربی کا یہ ماحول نہ بنایا ہوتا تو ابتدائی دور کے کٹر عقیدہ پرست آخر کار ہا ر جاتے۔ہندوستان کے طول وعرض میں شاید چھوٹی چھوٹی مسلمان ریاستیں وجود میں آجاتیں لیکن وہ عظیم الشان سماج وجود میں نہ آتا جس کے شاندار مظاہر ہمیں مغل اور اس کے بعد کے دور میں نظر آتے ہیں۔ یہ صوفیا کا ہی کمال تھا کہ تقسیم کے باوجود آج کے ہندوستان میں 20یا22کروڑ مسلمان موجود ہیں۔ ان کی خانقاہیں اور درگاہیں آج بھی صرف مسلمانوں کے لیے ہی نہیں ہندوؤں کے لیے بھی واجب الاحترام ہیں، ہم آج بھی اعلیٰ طبقات سے تعلق رکھنے والے ہندو زائرین کو صوفیا کی ان درگاہوں پر سرجھکاتے اور منتیں مانگتےد یکھتے ہیں۔

یہ ان صوفیا کی رواداری تھی جس نے ذات پات میں جکڑے ہوئے کروڑوں انسانوں کو اپنے سینے سے لگا یا اور ا ن کے لیے ایک ایسی دنیا کے دروازے کھول دیے جو کسی مسجد ،کسی درگاہ ، کسی خانقاہ میں قدم رکھنے کا اتنا ہی حق رکھتے تھے جتنا کسی سیدیا کیس صدیقی ،فاروقی کا حق تھا، وہ 9سلاطین کے دربار سے وابستہ رہنے والے ملک الشعرا ، امیر الامرا ،امیر خسرو کے برابر بیٹھ کر ‘‘محمدؐ میر محفل بود شب جائے کہ من بودم’’ سن سکتے تھے ۔ اور حضرت نظام الدین اولیا کے حضور رقص کرسکتے تھے۔یہ وہی صوفی روایت تھی جس نے ہمیں کبیر ،نانک، فرید ،بلھا ، سرمد، سچل ،وارث، لطیف جیسے ان گنت بڑے دیے ۔

http://newageislam.com/urdu-section/لوگوں-کانٹے-نہ-بونا/d/2329


پاکستان نامہ کریدتے ہو جو اب راکھ, Urdu Section, NewAgeIslam.com

Urdu Section
پاکستان نامہ کریدتے ہو جو اب راکھ

پاکستان نامہ کریدتے ہو جو اب راکھ...

زاہدہ حنا

ہوش سنبھالا تو جن بازاروں اور عمارتوں کے نام کان میں پڑے وہ بولٹن مارکیٹ ، جو ڑیا بازار، ڈینسو ہال اور لکشمی بلڈنگ تھے یہ ہول سیل بازار تھے ان سے مہینے بھر کا کھانے پینے کا سامان اکٹھا آتا تھا۔ ان ہی بازاروں سے کھلونے، دوائیں اور دسرا سامان خریدا جاتا تھا ۔ یہ وہ بازار تھے جن کی گلیوں اور دکانوں میں سرمایہ گردش کرتا تھا، شہر کا دل دھڑکتا تھا ، وہ شہر جس کے امکانات کو ذہن میں رکھتے ہوئے انگریزوں نے اسے ‘‘ملکہ مشرق’’ کہا تھا، جہاں کی میونسپل کارپوریشن سے تعلق رکھنے والے ہندو ،مسلمان اور پارسی سب ہی جی جان سے اسے دل نواز اور دل پسند بنانے میں جٹے ہوئے تھے ۔ انہیں شہر سے محبت تھی اور شہر ان کے مرتبے بلند کرتا تھا۔

شہر میں جب تک بجلی نہیں آتی تھی، اس کی گلیاں اور چوک روشن رکھنے کے لئے میونسپل کارپوریشن کے معمولی اور گمنام ملازم سرشام شانے پر سیڑھی اور دوسرے ہاتھ میں تیل کی کپی اٹھائے ہر گلی میں نمودار ہوتے، سیڑھی پر چڑھ کر کندھے سے جھاڑن اتارتے ،لالٹین کی چمنی صاف کرتے، کپی سے تیل ڈالتے اور لالٹین روشن کردی جاتی، اندھیرے میں لوگوں کو راستہ دکھانے کے لئے وہ معمولی لوگ گزر گئے۔ ان کا محض ذکر کراچی شہر کے ابتدائی تذکروں میں ملتا ہے ۔ اس کی گلیوں کو روشن کرنے والے، منہ اندھیرے اس کی سڑکوں کو پانی سے دھونے والے اسے سجانے اور سنوارنے والے سب چلے گئے ۔ اب شہر میں عوامی تعمیرات کا صلہ کرو ڑوں روپے ہے، اب سڑکوں کو بجلی کے قمقمو ں سے روشن کرنے والے کھمبوں پر بارود سے بھرے ہوئے تھیلے لٹکائے جاتے ہیں، اس کا انتظار کیا جاتا ہے کہ کب ماتمی جلوس پہنچے اور کب اسے باردو کا تحفہ پیش کیا جائے اور گھات میں وہ بھی بیٹھے ہوئے ہیں جو افراتفری اور بھگدڑ کے دوران نکلتے ہیں اور جائے حادثہ سے متصل بازاروں ،بینکوں،گوداموں اور کئی منزلہ کاروباری عمارتوں کے تالے تو ر کر سامان لوٹتے ہیں ،فاسفورس چھڑ کتے ہیں او رآگ لگاتے ہیں ۔

http://newageislam.com/urdu-section/پاکستان-نامہ-کریدتے-ہو-جو-اب-راکھ/d/2350


ضمیر کی آواز : دوسری قسط, Urdu Section, NewAgeIslam.com

Urdu Section
ضمیر کی آواز : دوسری قسط

زاہدہ حنا

یہاں یہ بھی عرض کردوں کہ اس وقت سندھ کے قحط زدہ علاقوں میں ٹی۔بی کے لاکھوں مریضوں کے علاج کے لئے صرف 25کروڑ روپیوں کی ضرورت ہے جو ہماری دیا لو دھنوان حکومت پاکستان فراہم نہیں کر سکی ہے۔ اور کرےبھی تو کیسے، فوجی اخراجات سے ‘‘دفاع وطن’’ کی ضروریات سےکچھ بچے تو سہی ۔پاکستان کا دفاعی بجٹ ہمیشہ ایک سربستہ راز رہا ہے۔ اس کے چند نکار جو ہمارے علم میں ہیں، ان کے مطابق 1996میں 11؍ارب روپے پنشنوں پر خرچ ہوئے، 1997میں یہ رقم بڑھ کر 14؍ارب روپے ہوگئی ہے اور اسے بھی دفاعی بجٹ سے نکال کر شہریوں کے اخراجات میں دیکھایا گیا ہے۔ صرف اس لیے کہ یہ کہا جاسکے کہ ہم نےدفاعی اخراجات میں کمی کردی ہے جب کہ حقیقتاً ان اخراجات میں اضافہ کیا گیا ہے۔ پاکستان 1949۔1950میں اپنی جی۔ڈی ۔پی کا 32؍فیصد دفاع پر خرچ کرتا تھا۔ 1996۔1997میں یہ بڑھ کر 7؍فیصد ہوگیا اور 1997۔1998میں یہ خرچ 79فیصد تک جا پہنچا ۔ پاکستانی فوج، جسے ریٹائر ڈ جنرل حمید گل دنیا کی سب سےبڑی جہادی تنظیم کہتے ہیں ، 1976میں ایک ارب روپے ہوگئی ، یعنی 20برس میں صرف 115فیصد کا اضافہ ہوا اور اس سال جب وزیر خزانہ اعداد وشمار کا ہیر پھیر دکھاتے ہوئے دفاعی بجٹ میں کمی کا اعلان کررہے تھے ،عین اسی وقت بجٹ دستاویز ات میں دفاع کے شعبے میں پچھلے سال کی نسبت 15؍ارب روپے کا اضافہ دکھایا گیا تھا اور اگر شہری اخراجات میں ڈالی جانے والی رقم بھی شامل کرلی جائے تو دفاعی بجٹ ایک کھرب 59؍ارب 58؍کرو ڑ تک جا پہنچتا ہے۔

پاکستان کی موجودہ فوجی حکومت کے ایک وزیر قلمدان وزارت سنبھالنے سے پہلے بے پناہ دفاعی اخراجات کے نکتہ چینوں میں سے تھے ،انہوں نے حلف یافتہ ہونے سے پہلے یہ لکھا تھا کہ فوج بہت سے ایسے اخراجات بھی کرتی ہے جو دفاعی بجٹ کےلئے مخصوص ہونے والی رقم سے ہوا ہے۔ انہوں نے یہ لکھا تھا کہ ہمیں یہ نہیں معلوم ہوسکتا کہ پاکستان پر 36؍یا 38؍ارب ڈالر کے جو قرضے ہیں ان کا کتنا حصہ فو ج پر خرچ ہوا ہے۔ فوج کی مختلف خفیہ ایجنسیوں پر 4؍ارب روپے ، سول آرمڈ فورسز پر 2؍ارب روپے 70؍کروڑ روپے، پاکستان رینجرز پر ایک ارب اسّی کروڑ روپے ،فریئنٹیر کانسٹبلر ی پر 70؍کروڑ روپے اور وزارت دفاع پر ایک ارب 50؍کروڑ خرچ ہوتے ہیں ۔ یہ رقم دفاعی بجٹ سے ہوا ہے۔

http://newageislam.com/ضمیر-کی-آواز---دوسری--قسط/urdu-section/d/2365


ضمیر کی آواز: تیسری قسط, Urdu Section, NewAgeIslam.com

Urdu Section
ضمیر کی آواز: تیسری قسط
زاہدہ حنا
‘‘مجھے آج بھی وہ دن پوری طرح یاد ہے۔ میں اسکول میں پڑھتا تھا ۔صبح سویرے میری ماں نے مجھے بہن کو کھانا پہنچانے کےلیے کہا ۔ میں نے انکار کردیا ۔میری ماں نے مجھے بہت برا بھلا کہا۔ بادل ناخواستہ میں نے کھانا لیا اوریلوے اسٹیشن کی طرف چل پڑا ۔ میں ابھی اسٹیشن پر پہنچا ہی تھا کہ سائرن بجنے لگا ۔میں بھاگا بھاگا گھر واپس پہنچا ۔میرا خیال تھا کہ حملے کی خبر سن کر ماں مجھے بہن کے پاس نہیں بھیجے گی ۔ ماں نے مجھے ڈانٹ ڈپٹ کر دوبارہ بھیج دیا ۔ میں اسٹیشن کے بینچ پر بیٹھا ریل گاڑی کا انتظار کرنے لگا۔ اچانک تیز روشنی کا ایک جھما کا ہوا ایک لمحے کے لئے ہر چیز نیلاہٹ مائل زردی چھا گئی۔ چندلمحوں کے لئے میری آنکھیں چندھیاں گئیں اور ہم نیم بیہوش ہوگیا۔ ایسا محسوس ہوا جیسے ہر چیز مسخ ہوچکی ہے ۔ اس روشنی کے فوراً بعد ایک زوردار دھماکے کی آواز سنائی دی۔ مجھے لگا کہ جیسے کسی نے میرا معدہ چیر کرمیری انتڑیاں باہر نکال لی ہیں۔ اس روشنی اور دھماکے نے بڑی بڑی عمارتیں ملبے کا ڈھیر بنا ڈالیں ۔ جس جگہ پر میں کھڑا تھا وہ بم گرنے کے مقام سے تقریباً سات کلو میٹر کے فاصلے پر تھی لیکن اس کے باوجود دھماکے کا اثر ایسا تھا کہ اس نے مجھے ہوا میں اچھال دیا۔ یہ سب کچھ ایک لمحے میں ہوگیا ۔پھر مجھے اپنے گالوں پر تپش محسو س ہوئی ۔میں نے اوپر دیکھا کہ نارنجی رنگ کی لہروں کی صورت میں روشنی اور تپش چاروں جانب پھیل رہی ہے۔ میں ایک بینچ کے نیچے چھپ گیا۔ اسی آگ اور تپش کے بیچ میں نے دو جنگی جہاز دیکھے جن سے یہ ایٹم بم گرایا گیا تھا۔ میں گھر پہنچا تو میری ماں بھی خوف سے کانپ رہی تھی۔ علاقے کے سبھی لوگ اکٹھے ہوچکے تھے۔کسی کو معلوم نہیں تھا کہ دراصل ہوا کیا ہے۔ اسی اثنا میں ہمیں کچھ لوگ اپنی طرف آتے ہوئے دکھائی دیے۔ یہ لوگ بھاگے چلے آرہے تھے ۔ہرکوئی بری طرح زخمی اور جھلسا ہوا تھا۔ ہمارے قریب پہنچ کر تقریباً سبھی گر پڑے ۔کوئی سر مررہا تھا، کوئی پانی مانگ رہا تھا کوئی چیخ رہا تھا اور کوئی خاموش کھلی آنکھوں کے ساتھ آسمان کی جانب دیکھے جارہا تھا ۔ ہم لوگ دہشت کے عالم میں انہیں بچانے کی کوشش کرنے لگے۔ اچانک میری ماں نےمجھ سے پوچھا کہ میری بہن کہاں ہے ۔ وہ بھی اسوقت شہر میں تھی۔
http://newageislam.com/urdu-section/ضمیر-کی-آواز--تیسری-قسط/d/2375

ضمیر کی آواز: چوتھی قسط, Urdu Section, NewAgeIslam.com

Urdu Section
ضمیر کی آواز: چوتھی قسط

زاہدہ حنا

میجر کلاڈ ایتھر لے ہیرو شیما پر ایٹم بم گرانے والے طیارے کا پائلٹ تھا۔ وہ ایک نوجوان پر جوش اور پوش امریکی تھا۔ اسے بتایا گیا تھا کہ جمہوریت ، انسانیت، امن پسندی اور وطن پرستی ایسی اعلیٰ اقدار کی ‘‘حفاظت’’ کے لئے اسے ‘‘ننہا لڑکا’’ نامی ایک بم ایک شہر پر گرانا ہے اور واپس آجانا ہے۔ وہ اپنے نشانے پر پہنچا ،اس نے ایک نظر شہر کو دیکھا ،اپنے ساتھی کو اشارہ کیا ، بم طیارے سےجدا ہوا، طیارہ واپسی کے لئے مڑا تو میجر ایتھر لے نے نیچے پھیلے ہوئے شہر پر نظر کی۔ اسے اپنی آنکھوں پر یقین نہیں آیا ۔ چند لمحوں کے اندر اندر وہ جیتا جاگتا شہر نابو د ہوچکا تھا۔ وہ اپنا ‘‘فرض’’ انجام دے چکا تھا۔ اس کے ساتھی اس بات پر پھولے نہیں سمار رہے تھے کہ انسانی تاریخ کے مہلک ترین ہتھیار کو سب سے پہلے استعمال کرنے کا اعزاز ا نہیں حاصل ہوا ہے جبکہ کلاڈ کا چہرہ زردتھا ، جبڑے بھنچے ہوئے تھے ۔ وہ سوچ رہا تھا کہ ننھے لڑکے تو اپنی شرارتوں سے لوگوں کو دل مو ہ لیتے ہیں، یہ بم کیسا ‘‘ننھا لڑکا’’ تھا جس نے چند سیکنڈ کے اندر اندرایک ہنستے بستے شہر کو راکھ کا ڈھیر بنادیا ۔ وہ فوجی اڈے پر پہنچا تو ہیرو تھا ۔ اس کے ساتھی، اس کے اس سفر پر اسے مبارکباد دے رہے تھے ،فتح کا جشن منارہے تھے لیکن وہ چپ چاپ ایک طرف کو جابیٹھا اور پھر اس نے کئی دن اور کئی رات کسی سے کلام نہیں کیا۔

میجر کلاڈ ایتھر لے بیسوی صدی کی امریکی تاریخ کا وہ باضمیر انسان ہے جس نے 6اگست 1945کو ہی جان لیا تھا کہ سیاستداں اور جرنیل ‘‘قرض شناسی’’ اور ‘‘وطن سے وفاداری’’ کے نام پر اس سے ایک ایسے بھیانک جرم کا ارتکاب کرانے میں کامیاب ہوگئے ہیں جس کے کرنے کا اس نے کبھی تصور بھی نہیں کیا تھا۔ وہ جاگتا رہتا تو اس کی آنکھوں میں ایک شہر کے صفحہ ہستی سے مٹ جانے کا منظر کھنچا رہتا اور سوتا تو اذیت کے جہنم میں جھلستےہوئے ہزاروں چہرے اسے اپنی طرف تکتے نظر آتے۔ ان کے کربناک چیخیں اس تک پہنچتیں اور وہ دیو انوں کی طرح سوتے سے اٹھ بیٹھتا ۔ انسانیت کا مجرم ہونے کا یہ احساس اسے دیمک کی طرح کھانے لگا ۔ تنگ آکر اس نے امریکی فضائیہ کی شاندار ملازمت ترک کردی اور پیٹ پالنے کے لیے معمولی نوکریاں کرنے لگا۔ ذہنی حالت بگڑی تو نفسیاتی معالجوں کے پاس گیا۔ ان ہی دنوں 1950میں امریکی صدر ٹرومین نے ایٹم بم سے کہیں زیادہ مہلک ہتھیار ‘‘ہائیڈروجن بم’’ بنانے کا اعلان کیا تو ایتھر لے پر ڈپریشن کا اتنا شدید دورہ پڑا کہ اس نے نیند کی گولیاں کھاکر خودکشی کی کوشش کی۔ دوسری مرتبہ اس نے اپنی کلائی رگیں کاٹ لیں لیکن بچالیا گیا ۔ اسی دوران وہ ہیروشیما کے ان ہسپتالوں کو وقتاً فوقتاً رقم بھیجتا رہا جہاں ایٹمی حملے کے متاثرین کا علاج ہوتا تھا۔ اس نے جاپانی ڈاکٹر وں، صحافیوں اور دانشوروں کو خط لکھے اور انہیں یہ باور کرانےکی کوشش کی کہ ہیرو شیما پر گرائے جانے والے بم کی ہولناکی اور تباہ کاری کی شدت سے وہ واقف نہ تھا۔ نادانستگی میں اس سے جس جرم کا ارتکاب ہوا اس کی اذیت نہ اسے دن کو چین لینے دیتی ہے اور نہ رات کو آرام کرنے دیتی ہے۔

http://newageislam.com/ضمیر-کی-آواز--پانچویں-قسط/urdu-section/d/2384


ضمیر کی آواز: پانچویں قسط, Urdu Section, NewAgeIslam.com

Urdu Section
ضمیر کی آواز: پانچویں قسط

زاہدہ حنا

پہلی جنگ عظیم شروع ہوئی تو آئین اسٹائن امن کے لیے لڑرہا تھا جب کہ اس کے ساتھی پروفیسر ،سائنسداں اور اسکالر جنگی جنون کے سیلاب میں بہہ چکے تھے۔ اس موقع پر آئن اسٹائن نے کھل کر جنگ کی مخالفت کی اور اسے ‘‘فریب کی وبا’’ سے تشبیہہ دی۔ آئین اسٹائن کے ان خیالات کو جرمنی میں شدید ناپسندید گی کی نظر سے دیکھا گیا اور یہ اس کی سوئس شہریت تھی جس نے اسے گرفتاری سےبچائے رکھا ۔ کچھ ایسا ہی حال اس کے دوست اور اس عہد کے عظیم فلسفی برٹرینڈرسل کا انگلستان میں تھا۔ وہ بھی جنگ کا بدترین دشمن تھا۔ اسے بھی برطانوی عوام ‘‘غدار’’ اور ‘‘بزدل’’ جیسے ‘‘خطابات ’’ سے نوازتے تھے۔

جنگ ختم ہوئی تو جرمنی میں آئن اسٹائن کے خلاف بہت بڑے پیمانے پر مہم چلائی گئی، جس میں اس کے نظر یہ اضافیت کو بھی رد کرتے ہوئے باطل قرار دیا گیا ۔ یہ صورت حال اس کے ساتھیوں اور دوسرے پروفیسر وں کے لیے صدمے اور تکلیف کا سبب تھی۔ لیکن ا ن کی بزدلی آرے آئی اور وہ اس کے حق میں آواز اٹھانے کی ہمت نہ کرسکے۔ آئین اسٹائن کو ہجوم سے گھبرا ہٹ ہوتی تھی اور وہ لوگوں کو سامنا کرنے سے کتراتا تھا ۔ پھر وہی شخص اس زمانے میں نہ صرف جرأت و بے باکی کے ساتھ جلسوں سے خطاب کرنے لگا بلکہ اس نے ایسے تمام مقدمات میں بیانات دیے جو علمی حیثیت رکھنے والے مختلف اسکالرز پر صرف اس لیے چلائے جارہے تھے کہ وہ جرمن حکومت سے مختلف مؤقف اورنقطہ نظر رکھتے تھے۔

ہٹلر کے اقتدار سنبھالنے کے بعد نوبت یہاں تک پہنچی کہ آئن اسٹائن کو جان بچا کر جرمنی سے فرار ہونا پڑا۔ اس زمانے میں فاشزم کی مخالفت کرنے والے ادیبوں اور دانشوروں کی کتابوں کے ساتھ آئن اسٹائن کی کتابیں بھی جرمنی میں جلائی جارہی تھیں۔ اسی زمانے میں نازیوں نے آئن اسٹائن کے سر کی قیمت بیس ہزار مارک مقرر کی۔ وہ خود اپنی جان کی انتی بھاری قیمت پر حیران ہوتا رہا۔

جرمنی سے جان بچا کر نکلنے کے بعد وہ امریکہ چلا گیا اور پھر وہیں کا ہورہا۔1939میں کچھ سائنسدانوں نے آئن اسٹائن سے رابطہ کیا اور اسے اس بات پر آمادہ کیا کہ وہ امریکی صدر روز ویلٹ کو خط لکھے اور ان سے اصرار کرے کہ وہ ایٹم بم کی تیار ی کی طرف توجہ دیں کیو نکہ نازی جرمنی بھی ایٹم بم کی تیاریوں میں تیزی سے مصروف ہے۔صلح جو اور امن پسند آئن اسٹائن نے اس خوف سے کہ کہیں جرمنی جوہری ہتھیار بنانے میں پہل نہ کرجائے، اپنی زندگی کا وہ قدم اٹھایا جس کا قلق اس کے دل سے مرتے دم تک نہ گیا۔ اس کی تجویز کو مانتے ہوئے امریکی صدر نے ‘‘مین ہیٹن پراجیکٹ’’ کی منظوری دے دی، یہی وہ پروجیکٹ تھا جس نےدنیا کے پہلے ایٹم بم کو جنم دیا۔ یہ درست ہے کہ آئن اسٹائن نہ تو جوہری طبیعات پر کام کررہا تھا اور نہ اس نے ‘‘مین ہیٹن پروجیکٹ’’ کی کامیابی میں کوئی کردار ادا کیا۔ اس کے باوجود حقیقت یہی ہے کہ اسی کی ترغیب پر یہ پروجیکٹ قائم ہوا اور اسی کے تحت 16جولائی 1945کو وقت سحر دنیا کا پہلا کامیاب ایٹمی تجربہ ہوا جس کی بنیاد پر وہ ایٹم بم تیار ہوئی جو ہیروشیما اور ناگا ساکی پر گرائے گئے اور جن کے گرائے جانے سے اس دنیا میں جوہری اسلحے کی تباہ کاریوں کا آغاز ہوا۔

http://newageislam.com/ضمیر-کی-آواز--پانچویں-قسط/urdu-section/d/2384